― 25 апреля 2025 г.

TÜRKSOY Bosh kotibi Sulton Raev Qozog‘iston Xalqi Assambleyasi medali bilan taqdirlandi

2025-yil 24-aprel kuni Ostona shahrida Qozog‘iston Xalqi Assambleyasining 30 yilligiga bag‘ishlangan 34-sessiyasi bo‘lib o‘tdi. Ushbu sessiyaga Qozog‘iston Respublikasi Prezidenti, Assambleya Raisi Qasim-Jomart Toqayev raislik qildi.

Tadbirda Xalqaro TÜRKSOY Turk madaniyati tashkiloti Bosh kotibi Sulton Raev ham ishtirok etdi. Qozog‘iston Respublikasi Prezidentining farmoniga asosan, Sulton Raev Qozog‘iston Xalqi Assambleyasi medali bilan taqdirlandi.

1995-yilda tashkil etilgan Qozog‘iston Xalqi Assambleyasi mamlakatda tinchlik, millatlararo totuvlik va ijtimoiy birdamlikni mustahkamlashda, shuningdek, Qozog‘istonning xalqaro maydondagi ijobiy va tinchlikparvar imijini shakllantirishda muhim o‘rin tutadi.

Sulton Raev OAVga bergan intervyularida hozirgi zamon jamiyatida tinchlik va totuvlik eng muhim qadriyatlar ekanini ta’kidlab, quyidagi fikrlarni bildirdi:

“Madaniyat — bu tinchlik, ezgulik va madaniyatlararo muloqot g‘oyalarini ilgari suruvchi kuchli vosita. Umuman olganda, milliy birlikni mustahkamlashga xizmat qiluvchi barcha davlat va jamoat mexanizmlarini yanada takomillashtirish zarur.”

Prezident Qasim-Jomart Toqayev o‘z nutqida Qozog‘iston Xalqi Assambleyasi oldida turgan ustuvor vazifalarni belgilab berdi. Jumladan:

• Assambleya faoliyatini mintaqalarda yanada jonlantirish, ayniqsa aholisi zich joylashgan Olmaota viloyatida yangi “Do‘stlik uyi”ni barpo etish;
• Qoraday, Uyg‘ur, Sayram, Panfilov kabi turli etnoslar istiqomat qiluvchi tumanlarda Assambleya bo‘limlarini ochish;
• Barcha “Do‘stlik uylari”ni sayyohlik yo‘nalishlari xaritasiga kiritish;
• Axborot maydonida birlik va totuvlik g‘oyalarini keng yoritish, ayniqsa Qozog‘iston Xalqi Assambleyasi Jurnalistlar klubini faol qo‘llab-quvvatlash;
• Etnoslar tillarida faoliyat yuritayotgan OAVlarga tizimli yordam ko‘rsatish;
• Madaniyat va san’at salohiyatidan keng foydalanish, jumladan mashhur adib va san’atkorlar muzeylarining ko‘rgazmalarini tashkil etish;
• Etnomadaniy markazlar tomonidan yig‘ilgan nodir kolleksiyalarni milliy madaniy meros tarkibiga kiritish.

Ma’lumot o‘rnida: Qozog‘iston Xalqi Assambleyasi joriy yilda 30 yilligini nishonlamoqda. 1995-yil 1-martda tashkil etilgan bu tuzilma bugungi kunga kelib barqarorlik va totuvlik timsoliga aylangan. Yubiley munosabati bilan mamlakat bo‘ylab 150 dan ortiq yirik tadbirlar o‘tkazilishi rejalashtirilgan.

Bugungi kunda Qozog‘iston — 124 millat vakillari tinch-totuv yashab kelayotgan ko‘p millatli mamlakat hisoblanadi. Milliy statistika byurosi ma’lumotlariga ko‘ra, 2025-yil 1-aprel holatiga ko‘ra mamlakat aholisi soni 20 316 155 nafarni tashkil etgan. Ulardan eng yirigi — qozog‘lar (14 220 289), keyingi o‘rinlarda ruslar — 2 983 344, o‘zbeklar — 660 585, ukrainlar — 375 925, uyg‘urlar — 301 593, nemislar — 224 353, tatarlar — 219 212, ozarbayjonlar — 152 852 va koreyslar — 120 270 kishi.