― 23 апреля 2025 г.

Istanbuldagi Atatürk madaniyat markazida “Zamon qahramonlari” raqs festivali bo‘lib o‘tdi

2025-yil 23-aprel kuni Istanbuldagi Atatürk madaniyat markazida “Zamon qahramonlari” nomli raqs festivali tantanali tarzda bo‘lib o‘tdi.

Tadbir Turkiya Respublikasi Madaniyat va turizm vazirligi hamda Xalqaro Turk madaniyati tashkiloti — TÜRKSOY hamkorligida tashkil etildi. Festival doirasida Qozog‘iston, Qirg‘iziston, Tatariston kabi mamlakatlardan tashrif buyurgan 100 nafardan ortiq bolalar sahnada o‘z chiqishlarini namoyish etdilar.

Tatar, Ozarbayjon, O‘zbekiston, Kavkaz, Xatay va Van mintaqalariga xos bo‘lgan rang-barang folklor raqslar tomoshabinlar tomonidan katta qiziqish va iliq taassurot bilan qarshi olindi.

Festival 23-aprel — Turkiyada keng nishonlanadigan Milliy suverenitet va bolalar bayrami munosabati bilan o‘tkazildi va ushbu tarixiy sana munosib ruhda bayramona shukuh bilan nishonlandi.