― 21 марта 2025 г.
ТҮРКСОЙ Наурыз мерекесіне орай Анкарада ауызашар берді
Анкараның Көлбасы ауданындағы Вилает үйлерінде ұйымдастырылған ауызашар бағдарламасы Құран Кәрім оқумен басталды.
ТҮРКСОЙ Бас хатшысы Сұлтан Раевтың ұйымдастыруымен өткен ауызашарға Сыртқы істер министрінің орынбасары Елші А. Беррис Экинчи, Мәдениет және туризм министрінің орынбасары Сердар Чам, МХП Төрағасының орынбасары және Самсун депутаты Ілияс Топсакал, Молдованың Анкарадағы Елшісі Дмитрий Кройтор, SESRIC Бас директоры Зехра Зүмрүт Селчук, ЮНЕСКО Түркия Ұлттық комиссиясының төрағасы Өжал Оғуз, Ахмет Жауад институтының төрағасы Рухи Ерсой және ТҮРКСОЙ Бас хатшысының орынбасары Сайит Юсуф қатысты. Сонымен қатар дастарханда ТҮРКСОЙ-дың серіктес университеттерінің ректорлары, дипломаттар мен қонақтар да болды.
Сұлтан Раев: Рамазан жүректердің тазаратын, адамның нәпсісімен бетпе-бет келетін кезеңі
Ауызашардан кейін өткен протоколдық сөзінде ТҮРКСОЙ Бас хатшысы Сұлтан Раев Рамазанның тек бір ай ғана емес, адамның ішкі дүниесіне қайта оралатын, нәпсісімен бетпе-бет келетін және жүрегін тазартатын кезеңі екенін атап өтті. Раев: «Бұл ай тәннің аштығы мен жанның тоқтығын біріктіретін; сабырды, шүкіршілікті және мейірімділікті үйрететін қасиетті кезең. Ауызашар дастарханы осы дана сапардың ең маңызды аялдамаларының бірі», – деді.
Наурыз – түркі мәдениетінің өзегі
Осы мағыналы түнде тағы бір қуаныш бар екенін айтқан Раев сөзінде: «Бүгін 21 наурыз – Ұлыстың Ұлы күні Наурыз мерекесі. Наурыз – табиғаттың оянуы, өмірдің жаңаруы, берекенің жаршысы. Сонымен қатар, Наурыз Рамазан сияқты адамның ішкі дүниесінде де жаңаруды білдіреді. Наурыз – түркі мәдениетінің өзегі. Бірліктің, бауырластықтың, бөлісудің ежелгі символы. Жүректерді байланыстыратын бұл дәстүр бізге бір тамырдан шыққанымызды және бір аспанға қарайтынымызды еске салады», – деді.
Министрдің орынбасары А. Беррис Экинчи сөзінде Наурыздың түріктер үшін табиғаттың қайта жандануын, жаңаруды, достық пен бейбітшілікті білдіретінін атап өтіп, бұл ерекше күннің Орта Азиядан Анадолыға, Балқаннан Таяу Шығысқа дейін кең географияда аталып өтілетінін атап өтті.
Экинчи сөзінің жалғасында: «Наурыз қоғамдық бірліктің, өзара көмектің және ынтымақтастықтың символы болып табылады. Бұл ерекше күн қиындықтарға қарсы бірге тұруға және кез келген кедергіні еңсеруге кеңес береді», – деп түркі халықтары арасындағы ортақ құндылықтардың Наурыз мерекелерімен нығая түсетінін атап өтті.
Экинчи: «Биыл қасиетті Рамазан айына сәйкес келген Наурыз және осы ауызашар кездесуі арқылы табиғатымызға, мәдени құндылықтарымызға және бірлігімізге деген адалдығымызды тағы бір еске түсіреміз», – деп Түркі мемлекеттері ұйымы (ТМҰ) және ТҮРКСОЙ сияқты ынтымақтастық ұйымдары арқылы Түркі әлемі арасындағы бірлік пен ынтымақтастықты нығайтатындарын жеткізді.
Бағдарламада сөз сөйлеген Министрдің орынбасары Сердар Чам Рамазан мен Наурызды бірге бастан кешіргеніне қуанышты екенін білдіріп, болашақта да сау және бейбіт Рамазан мен Наурызды өткізуге тілек білдірді.
Ауызашар бағдарламасында сөз алған МХП Төрағасының орынбасары Ілияс Топсакал да Рамазанның қоғамды сергек ұстайтын қайнар көз екенін айтып, оразаның ішкі жан-дүниеге бұратын құлшылық екенін жеткізді. Наурыздың мыңдаған жылдық дәстүрді көрсететінін айтқан Топсакал ұлттық мерекелердің Түркі әлемінің бірлігі мен ынтымақтастығын нығайтатынын атап өтті.
Бірінен соң бірі сөйлеген жиын осылайша Наурыз мерекесінің дәстүрлі рәсімдерінің бірі – жұмыртқа жарумен жалғасты.
