― 5 апреля 2025 г.

TÜRKSOY-un Baş Katibi Sultan Raev Qazaxıstanın Mədəniyyət və İnformasiya Naziri Aida Balayeva ilə görüşüb

2025-ci il Türk Dünyasının Mədəni Paytaxtı elan edilən Aktau şəhərində keçirilən rəsmi açılış mərasimləri çərçivəsində, TÜRKSOY-un Baş Katibi Sultan Raev Qazaxıstanın Mədəniyyət və İnformasiya naziri Aida Balayeva ilə görüş keçirib.

Görüşdə Baş Katib Raev, Aktau şəhərinin Türk Dünyasının Mədəni Paytaxtı seçilməsi ilə əlaqədar Qazaxıstanı təbrik edərək, hazırlıq prosesində Nazir Balayevanın rəhbərliyi altında həyata keçirilən uğurlu işlərdən məmnunluğunu bildirib. Raev, Qazaxıstanın bu əhəmiyyətli titulu layiqincə daşıyacaq bir ev sahibliyi nümayiş etdirdiyini qeyd edərək, Türk Dünyasının mədəni irsini yaşatmaq və gələcək nəsillərə ötürmək yolunda bu cür əməkdaşlıqların böyük əhəmiyyət kəsb etdiyini vurğulayıb.

Görüşdə həmçinin, 2025-ci il ərzində TÜRKSOY və Qazaxıstanın birgə həyata keçirəcəyi mədəni tədbirlər müzakirə edilib. İl boyu təşkil ediləcək konsertlər, sərgilər, festivallar və sənət görüşləri vasitəsilə Aktau şəhərinin yalnız Qazaxıstan üçün deyil, bütün Türk Dünyası üçün mədəniyyət və incəsənət mərkəzinə çevrilməsi nəzərdə tutulur.

Nazir Aida Balayeva isə TÜRKSOY-un Türk Dünyası üzrə həyata keçirdiyi mədəni layihələrin böyük dəyər daşıdığını qeyd edərək, Aktauda keçiriləcək tədbirlərin həm Qazaxıstanın, həm də Xəzər dənizi sahilində yerləşən bu unikal şəhərin beynəlxalq səviyyədə tanıtımına əhəmiyyətli töhfə verəcəyini bildirib.

Baş Katib Raev, Türk Dünyasının müxtəlif regionlarından gələn sənətçilərin açılış mərasimlərində bir araya gəlməsinin, Aktau şəhərini mədəni cazibə mərkəzinə çevirəcək prosesin ən güclü göstəricisi olduğunu vurğulayıb.