― 21 марта 2025 г.

TÜRKSOY Novruz münasibətilə Ankarada iftar təşkil etdi

Ankaranın Gölbaşı rayonundakı Vilayət Evlərində təşkil olunan iftar proqramı Qurani-Kərim tilavəti ilə başladı.

TÜRKSOY-un baş katibi Sultan Raevin ev sahibliyi etdiyi iftar süfrəsində Türkiyənin Xarici İşlər nazirinin müavini, səfir A. Berris Ekinci, Mədəniyyət və Turizm nazirinin müavini Serdar Çam, MHP başqan müavini və Samsun millət vəkili İlyas Topsakal, Moldovanın Ankaradakı səfiri Dmitri Kroitor, SESRIC-in baş direktoru Zehra Zümrüt Selçuk, UNESCO Türkiyə Milli Komissiyasının sədri professor Dr. Öcal Oğuz, Ahmet Cavad İnstitutunun sədri professor Dr. Ruhi Ersoy və TÜRKSOY-un baş katib müavini Sayıt Yusuf iştirak etdilər. Bundan əlavə, TÜRKSOY-un əməkdaşlıq etdiyi universitetlərin rektorları, diplomatlar və qonaqlar da iftarda yer aldılar.

Sultan Raev: Ramazan insanın nəfsi ilə üzləşdiyi, qəlbin təmizləndiyi bir zaman kəsiyidir

İftar sonrası keçirilən protokol çıxışlarında TÜRKSOY-un baş katibi Sultan Raev Ramazan ayının təkcə bir ay deyil, insanın öz daxilinə yönəldiyi, nəfsi ilə üzləşdiyi və qəlbini təmizlədiyi bir zaman olduğunu vurğuladı. Raev dedi: “Bu ay, bədənin aclığını ruhun toxluğuna qovuşduran, səbr, şükür və mərhəməti öyrədən mübarək bir dövrdür. İftar süfrələri isə bu hikmətli yolçuluğun ən mənalı dayanacaqlarından biridir.”

Novruz, Türk mədəniyyətinin özüdür

Bu mənalı gecədə başqa bir sevinc hissi də yaşadıqlarını qeyd edən Raev çıxışında belə dedi: “Bu gün, 21 mart – Beynəlxalq Novruz Günüdür. Novruz, təbiətin oyanışı, həyatın təzələnməsi, bərəkətin müjdəçisidir. Eyni zamanda Novruz, Ramazan kimi, insanın daxili aləmində də bir dirçəlişi təmsil edir. Novruz, Türk mədəniyyətinin özüdür. Birliyin, qardaşlığın, paylaşmanın qədim simvoludur. Qəlbləri bir-birinə bağlayan bu ənənə bizə eyni kökdən gəldiyimizi və eyni göyə baxdığımızı xatırladır.”

Xarici İşlər nazirinin müavini A. Berris Ekinci də çıxışında Novruzun türklər üçün təbiətin yenidən doğuluşunu, yenilənməni, dostluğu və sülhü təmsil etdiyini vurğulayaraq, bu xüsusi günün Orta Asiyadan Anadoluya, Balkanlardan Orta Şərqə qədər geniş bir coğrafiyada qeyd olunduğunu bildirdi.

Ekinci çıxışının davamında “Novruz, cəmiyyətin birliyinin, yardımlaşmanın və həmrəyliyin simvolu olub. Bu xüsusi gün, çətinliklər qarşısında birgə dayanmağı və hər cür maneəni aşmağı öyrədir.” sözləri ilə Türk xalqları arasında ortaq dəyərlərin Novruz bayramı vasitəsilə daha da möhkəmləndiyini qeyd etdi.

Ekinci sözlərini belə tamamladı: “Bu il mübarək Ramazan ayına təsadüf edən Novruz və bu iftar görüşü sayəsində təbiətimizə, mədəni dəyərlərimizə və birliyimizə olan bağlılığımızı bir daha xatırlayırıq.” O, Türk Dövlətləri Təşkilatı (TDT) və TÜRKSOY kimi əməkdaşlıq qurumları vasitəsilə Türk Dünyası arasındakı birlik və həmrəyliyi gücləndirəcəklərini vurğuladı.

Mədəniyyət və Turizm nazirinin müavini Serdar Çam isə çıxışında Ramazan və Novruzu birlikdə qeyd etməkdən duyduğu məmnuniyyəti ifadə edərək, gələcəkdə də sağlam və firavan Ramazan və Novruz bayramları keçirməyi arzuladığını bildirdi.

MHP başqan müavini İlyas Topsakal da iftarda çıxış edərək Ramazan ayının cəmiyyəti diri saxlayan mənəvi qaynaq olduğunu qeyd etdi. O, orucun insanı daxilə yönəldən bir ibadət olduğunu vurğuladı. Topsakal, Novruzun minilliklərdən bəri yaşadılan bir ənənə olduğunu bildirərək, milli bayramların Türk Dünyasının birlik və həmrəyliyini gücləndirdiyini ifadə etdi.

Çıxışlardan sonra Novruz bayramının ənənəvi rituallarından biri olan yumurta döyüşdürmə (toqquşdurma) mərasimi keçirildi.