― 16 марта 2025 г.
TÜRKSOY ilə Azərbaycan Mədəniyyət Nazirliyi arasında koordinasiya iclası keçirilib
TÜRKSOY və Azərbaycan Mədəniyyət Nazirliyi arasında 14 mart 2025-ci il tarixində koordinasiya iclası keçirilib.
Azərbaycan Respublikasının mədəniyyət naziri Adil Kərimli və TÜRKSOY-un Baş katibi Sultan Raevin iştirakı ilə təşkil olunan iclasda TÜRKSOY-un 2025-ci il üçün nəzərdə tutulan fəaliyyəti müzakirə edilib və əməkdaşlıq imkanları dəyərləndirilib.
Baş katib Sultan Raev, 5 aprel 2025-ci il tarixində keçiriləcək Aktau – Türk Dünyasının Mədəniyyət Paytaxtı Açılışı barədə ətraflı məlumat verərək, bu tədbirin Türk Dünyasının əməkdaşlığı və zəngin türk mədəniyyətinin təbliği baxımından əhəmiyyətini vurğulayıb. İclasda TÜRKSOY tərəfindən 2025-ci ilin Bəxtiyar Vahabzadə İli elan edilməsi çərçivəsində həyata keçiriləcək və il ərzində davam edəcək tədbirlər də müzakirə olunub.
Nazir Adil Kərimli Azərbaycan olaraq Türk Dünyasının Mədəniyyət Paytaxtı Açılışına geniş sənətçi heyəti ilə qatılmaqdan məmnun olduqlarını bildirərək, planlaşdırılan tədbirlərin uğurla həyata keçirilməsini arzulayıb. O, həmçinin 2025 – Bəxtiyar Vahabzadə İli üçün lazımi dəstəyi göstərməyə hazır olduqlarını qeyd edib.
TÜRKSOY-un Baş katibi Sultan Raev Azərbaycan Mədəniyyət Nazirliyinə dəstəyinə görə təşəkkür edərək, Azərbaycanda həyata keçirilən mədəniyyət yönümlü layihələrin əhəmiyyətini vurğulayıb. Səfəri çərçivəsində Mədəniyyət Nazirliyinin nəzdində fəaliyyət göstərən Mədəni və Yaradıcı Sənayelərin İnkişafı Mərkəzini də ziyarət edən baş katib, mərkəzin yaradıcı layihələrini yüksək qiymətləndirib. O, bu mərkəzin bütün Türk Dünyası üçün nümunəvi bir model olduğunu bildirərək, TÜRKSOY ilə mərkəz arasında ortaq layihələrin həyata keçirilməsi istiqamətində işlərin davam etdiyini qeyd edib.
İclasın əsas gündəm mövzularından biri də Türk Dünyasında animasiya sahəsinin inkişafı olub. TÜRKSOY, Bakı Mədəni və Yaradıcı Sənayelərin İnkişafı Mərkəzi və Türk Dünyası Animasiya Birliyinin birgə təşəbbüsü ilə başladılan pilot layihə barədə təqdimat keçirilib. Bu layihə çərçivəsində TÜRKSOY-a üzv ölkələrin müvafiq qurumlarının əməkdaşlığı ilə uşaqlar və gənclər üçün ortaq türk mədəniyyətini tanıdan animasiya layihələrinə maliyyə dəstəyi göstəriləcək bir sistemin yaradılması planlaşdırılır.
