― 21 марта 2025 г.

TÜRKSOY heyəti Novruz Bayramı münasibətilə Türkiyə Cümhuriyyəti Mədəniyyət və Turizm Nazirliyini ziyarət etdi

Türk Dünyası Novruz Bayramını coşqu ilə qarşılayır! Bu qədim bayram münasibətilə Beynəlxalq Türk Mədəniyyəti Təşkilatı (TÜRKSOY) Baş katibi Sultan Raev, TÜRKSOY-un Baş katib müavini Sayit Yusuf və onları müşayiət edən heyət Türkiyə Cümhuriyyəti Mədəniyyət və Turizm Nazirliyini ziyarət etdi. Heyəti öz qəbul otağında qarşılayan Türkiyə Cümhuriyyəti Mədəniyyət və Turizm naziri Mehmet Nuri Ersoy, Türk Dünyasının mədəni və tarixi yaddaşını qorumaq istiqamətində göstərdiyi səyləri vurğuladı.

"Novruz, Türk Dünyasının yaddaşını təzə saxlayır"

Novruzun Türk Dünyasının ortaq mədəni irsini əks etdirdiyini və min illərdir davam edən ənənə kimi birlik və həmrəyliyi təcəssüm etdirdiyini bildirən nazir Ersoy, bu bayramın tarixi şüuru gücləndirdiyini qeyd etdi. Nazir çıxışında: "Novruz, əcdadlarımızın təbiətlə harmoniya içində yaşadığını, həyata verdikləri dəyəri və formalaşdırdıqları möhtəşəm yaşayış tərzini bizə xatırladan mühüm bir ənənədir." diye vurğuladı.

Texnologiyanın gətirdiyi qlobal təsirlərlə mədəni irsin qorunmasının əhəmiyyətinə diqqət çəkən Ersoy əlavə etdi: "Əl telefonlarından, cibimizdən əskik olmayan texnologiya məhsullarından yayılan və bir növ kimliyimizi unutdurmağa səbəb olan təsirlərə qarşı mübarizə aparırıq. Öz mədəniyyətimizi və tarix şüurumuzu qoruyaraq gələcəyə inamla addımlamalıyıq."

TÜRKSOY-un 32 illik mədəniyyət mübarizəsi

TÜRKSOY-un qurulduğu gündən etibarən Türk Dünyasının mədəniyyətini və ortaq dəyərlərini yaşatmaq üçün böyük fədakarlıq göstərdiyini bildirən nazir Ersoy dedi: "TÜRKSOY, Türk Dünyasının qəlbində mühüm yer tutur və bunun əsas səbəbi həyata keçirdiyi layihələrdir. Nazirlik olaraq biz də bu mədəniyyət mübarizəsində hər zaman çiyin-çiyinə addımlayacağıq."

Sultan Raev: "Novruz, Türkün töresi, Türkün bayramıdır!"

TÜRKSOY-un Baş katibi Sultan Raev Novruzun Türk Dünyası üçün təkcə baharın gəlişini xəbər verən bir bayram olmadığını, eyni zamanda birlik, qardaşlıq və bərəkəti simvolizə edən bir ənənə olduğunu ifadə etdi. Raev çıxışında bildirdi: "Novruz, bizi ortaq mədəni yaddaşımızda birləşdirən güclü bir bağdır. Bu əlamətdar günün 2009-cu ildə UNESCO tərəfindən "Qeyri-Maddi Mədəni İrs" kimi tanınması və 2010-cu ildə Birləşmiş Millətlər Təşkilatı tərəfindən "Beynəlxalq Novruz Günü" elan edilməsi bu bayramın ümumbəşəri dəyərini bir daha göstərir."

Görüş Türkiyə Cümhuriyyəti Mədəniyyət və Turizm naziri Mehmet Nuri Ersoy və TÜRKSOY Baş katibi Sultan Raevin Novruz ənənəsinə uyğun olaraq yumurta döyüşdürməsi ilə başladı və TÜRKSOY heyətində yer alan sənətçilərin musiqi proqramı ilə başa çatdı.