― 19 марта 2025 г.

TÜRKSOY Baş katibi Sultan Raev Berlində Türk Dünyası səfirləri ilə görüşüb

TÜRKSOY Baş katibi Sultan Raev 17 mart 2025-ci il tarixində Azərbaycan Mədəniyyət Mərkəzində keçirilən görüş çərçivəsində Berlində akkreditə olunmuş TÜRKSOY üzvü ölkələrin səfirləri ilə bir araya gəlib. Bu səfər, iyun ayında Berlində keçirilməsi planlaşdırılan “Türk Dünyasının Dünya Elminə və Mədəniyyətinə Töhfələri” adlı panel və paralel təşkil olunacaq digər mədəni tədbirlərin koordinasiyası məqsədilə baş tutub.

Görüşdə Azərbaycan Respublikasının Almaniyadakı səfiri Nəsimi Ağayev, Qazaxıstan Respublikasının səfiri Nurlan Onjanov, Qırğız Respublikası səfiri Ömürbek Tekebayev, Özbəkistan Respublikasının səfiri Dilşod Akhatov, Türkiyə Respublikasının səfiri Gökhan Turan, Türkmənistanın səfiri Berdimurat Rəcəbov və Yunus Əmrə İnstitutunun Almaniya üzrə koordinatoru Samet Kapısız iştirak ediblər.

TÜRKSOY-un çoxtərəfli mədəni əməkdaşlığı gücləndirmək istiqamətində gördüyü işlərin müzakirə olunduğu görüşdə, Berlində keçiriləcək genişmiqyaslı mədəniyyət proqramının Türk Dünyasının elm, incəsənət və mədəni irs sahələrindəki zənginliyini beynəlxalq ictimaiyyətə tanıtmaq baxımından əhəmiyyətli potensiala malik olduğu vurğulanıb.

Görüşdən sonra Azərbaycan Respublikasının Almaniyadakı səfiri cənab Nəsimi Ağayevin ev sahibliyi ilə TÜRKSOY Baş katibi Sultan Raevin səfəri münasibətilə Türk Dünyası səfirlərinin iştirakı ilə iftar süfrəsi təşkil edilib.