― 15 марта 2025 г.

Qədim İnsan Məskənlərinin Mühafizəsi: Təhdidlər və Müasir Yanaşmalar Konfransı Bakıda keçirildi

Azərbaycanın paytaxtı Bakıda, Heydər Əliyev Mərkəzində Azərbaycan Respublikası Mədəniyyət Nazirliyinin təşkilatçılığı ilə "Qədim İnsan Məskənlərinin Mühafizəsi: Təhdidlər və Müasir Yanaşmalar" adlı beynəlxalq konfrans keçirilib.

Konfransın açılış nitqləri Azərbaycan Respublikasının mədəniyyət naziri Adil Kərimli, TÜRKSOY-un Baş katibi Sultan Raev, Azərbaycan Milli Elmlər Akademiyasının prezidenti İsa Həbibbəyli, Türk Akademiyasının prezidenti professor Şahin Mustafayev, Türk Mədəniyyəti və İrsi Fondunun prezidenti Aktotı Raimkulova, UNESCO-nun Mədəniyyət və Təcili Hallar Departamentinin direktoru Krista Pikkat və İƏT Mədəniyyət İnstitutunun prezidenti Saad S. Xan tərəfindən edilib. İki gün davam edən tədbirdə müxtəlif ölkələrdən akademiklər, tədqiqatçılar, mütəxəssislər, qeyri-hökumət təşkilatlarının nümayəndələri və media mənsubları iştirak ediblər.

TÜRKSOY-un Baş katibi Sultan Raev konfransda çıxışı zamanı tarixdən əvvəlki insan məskənlərinin qorunmasının bütün bəşəriyyəti maraqlandıran qlobal məsələ olduğunu vurğulayıb. TÜRKSOY-un ortaq tarix və mədəni irsin qorunmasına verdiyi əhəmiyyəti qeyd edən Raev, “Kökləri minilliklərə söykənən qədim sivilizasiyamız bizə böyük bir məsuliyyət yükləyir. Bu irsin qorunması təkcə bir ölkənin deyil, bütün Türk Dünyasının və insanlığın ümumi məsələsidir”, – deyə bildirib.

Baş katib Sultan Raev Azərbaycanın tarix boyu mədəniyyətə və elmə verdiyi dəyəri xüsusi vurğulayaraq, ölkənin keçmişin izlərini gələcəyə daşımaqda aparıcı rol oynadığını qeyd edib. "Azərbaycanın belə vizioner layihələrə imza atması, bizim ortaq gələcəyimiz üçün olduqca qiymətlidir”, – deyə bildirib.

Azərbaycan Respublikasının mədəniyyət naziri Adil Kərimli isə konfransın açılışında çıxışı zamanı tarixi və mədəni irsin qorunmasının təkcə regional deyil, həm də qlobal məsuliyyət olduğunu qeyd edib. Nazir Kərimli bildirib ki, “Qədim insan məskənlərinin mühafizəsi təkcə keçmişimizə sahib çıxmaq deyil, həm də gələcəyimizi təmin altına almaqdır. Azərbaycan olaraq bu sahədə beynəlxalq əməkdaşlığı gücləndirməyə və ortaq layihələrə dəstək verməyə davam edəcəyik”.

Konfrans çərçivəsində müzakirə edilən əsas mövzular arasında iqlim dəyişikliyi, şəhərləşmə və tarixi irsin məhv edilməsi kimi qlobal problemlər yer alıb.