― 21 января 2025 г.

Prof. Dr. Aziz Sancara “Türk Dünyasının Mədəniyyət Elçisi” adı təqdim olundu

Prof. Dr. Aziz Sancara “Türk Dünyasının Mədəniyyət Elçisi” adı təqdim olundu

Nobel mükafatlı Türk elm adamı Prof. Dr. Aziz Sancara, TÜRKSOY Daimi Şurasının Azərbaycanın Şuşa şəhərində keçirilən 40-cı iclasında qəbul etdiyi qərar əsasında “Türk Dünyasının Mədəniyyət Elçisi” adı təqdim olundu.

Amerika Birləşmiş Ştatlarının Şimali Karolina ştatında yerləşən Aziz&Gwen Sancar Fondu nəzdindəki Sancar Mədəniyyət Mərkəzində 2025-ci il yanvarın 19-da təşkil olunan mərasimdə TÜRKSOY Daimi Şurasının üzvü olan nazirlərin yekdil qərarı ilə təyin edilmiş xüsusi “Türk Dünyasının Mədəniyyət Elçisi” nişanını təşkilatın Baş katibi Sultan Raev təqdim etdi.

“Türk Dünyasının Qüruru və İlham Mənbəyi”

Baş katib Sultan Raev mərasimdəki çıxışında Prof. Dr. Aziz Sancarın Türk Dünyasının qüruru və ilham mənbəyi olduğunu vurğuladı və bunları dedi:
“Hörmətli Aziz Sancar, siz yalnız bir elm adamı deyilsiniz, eyni zamanda Türk Dünyasının ortaq dəyərini və elmi dehasını əks etdirən bir simvolsunuz. Nobel mükafatı ilə bütün insanlığa fayda verən araşdırmalarınız, elmdəki üstün uğurlarınız və Türk mədəniyyətinin dəyərlərini əks etdirən təvazökarlığınız və zəhmətsevərliyinizlə insanlıq üçün nümunəvi şəxsiyyətsiniz. Kökünüzə bağlılığınız və dünyanın ən nüfuzlu platformalarında qazandığınız nailiyyətlər bizim üçün böyük motivasiya mənbəyidir. Bu ad sadəcə bir təqdir deyil, Türk Dünyasının sizə təşəkkürüdür. TÜRKSOY-un üzvü olan ölkələr adından sizə “Türk Dünyasının Mədəniyyət Elçisi” adını təqdim etməkdən böyük qürur duyuruq.”

TÜRKSOY-un Türk Dünyasındakı Rolu

Baş katib Raev çıxışında TÜRKSOY-un Türk Dünyasının mədəni zənginliklərini qoruma və tanıtma missiyasını qeyd edərək :
“TÜRKSOY, Türk Dünyasında qurulmuş ilk hökumətlərarası əməkdaşlıq təşkilatı olaraq 30 ildən artıqdır ki, bu coğrafiyanın mədəni inteqrasiyası üçün mühüm missiyalar yerinə yetirir. Türk Dünyasının birliyi, qədim millətimizin ən böyük dayağıdır.” dedi.

Duyğulu Anlar Yaşanan Tədbir

TÜRKSOY-un təqdimat filmi ilə başlayan tədbiri Aziz&Gwen Sancar Fondunun İdarə Heyətinin sədri İsmayıl Arslan yönətdi. Tədbirdə Türkiyə Cümhuriyyətinin Vaşinqton Səfirliyinin müşaviri Melih Seyfəddin Güngör, Sancar ailəsinin dostları, fərqli yaş qruplarından uşaqlar və universitet tələbələrindən meydana gələn təxminən 150 nəfər iştirak etdi.

Tədbir öncəsi Prof. Dr. Aziz Sancar Baş katib Sultan Raev və nümayəndə heyətini mərkəzin müxtəlif bölmələrini gəzdirərək gələcək layihələr haqqında məlumat paylaşdı. Bu vaxt qonaqlar Prof. Dr. Aziz Sancarın salona gəlməsini səbirsizliklə gözləyirdi. Qısa müddət sonra Prof. Dr. Aziz Sancar alqışlarla salona daxil oldu və coşqu ilə qarşılandı.

Türk Dünyasının Mədəniyyət Elçisi Nişanı Təqdim Olundu

Tədbir Türkiyə Cümhuriyyətinin Vaşinqton Səfirliyinin müşaviri Melih Seyfəddin Güngör və TÜRKSOY-un Baş katibi Sultan Raevin çıxışları ilə davam etdi. Nitqlərdən sonra Türk Dünyasının Mədəniyyət Elçisi nişanı alqışlarla Prof. Dr. Aziz Sancara təqdim edildi. Aziz Sancar bu adın və nişanın ona böyük sevinc bəxş etdiyini deyərək Türk Dünyasının potensialını vurğuladı:
“Birlikdə addımlamaq və elmə daha çox əhəmiyyət vermək Türk Dünyasını dünyanın ən güclü dövlətləri sırasına daşıyacaq.”

Prof. Dr. Aziz Sancar: "Bu Mənim Xəyalım idi"

Prof. Dr. Aziz Sancar, ona verilən "Türk Dünyasının Mədəniyyət Elçisi" adını həyatının ən mühüm mükafatı olduğunu söylədi. Bu nişanın Nobel mükafatından daha dəyərli olduğunu vurğulayan Sancar belə dedi:

“Bu nişan mənim üçün bütün mükafatlardan daha dəyərlidir. Bu mənim xəyalım idi. TÜRKSOY çox dəyərli bir qurumdur və bizi dünya səviyyəsində təmsil edəcəyinə ümid edirəm.”

Çıxışında Türk Dünyasının tarix boyu birlik mövzusunda yaşadığı çətinliklərə də toxunan Sancar bunları əlavə etdi:

“Tarixdə Türk boyları uzun müddət bir yerdə hərəkət etməyib. Ancaq bu gün birlikdəlikdən danışa biliriksə, bunda dövlət başçılarımızın, ürəyində Türklük şüurunu daşıyanların və TÜRKSOY kimi qurumların töhfəsi böyükdür.”

"Türk Dünyasındakı Türklük Şüuru Çox Güclüdür"

Prof. Dr. Sancar, uşaqlığından etibarən Türklük şüuru ilə böyüdüyünü bildirərək bunları dedi:

“8 yaşından bəri Türkçüyəm. Türk Dünyasının birliyi və Türklük şüuru ilə böyüdüm.”

Türkmənistan xaricində müstəqil Türk dövlətlərinin hamısını ziyarət etdiyini ifadə edən Sancar, Türk Dünyasında Türklük şüurunun çox güclü olduğunu müşahidə etdiyini vurğuladı. O, müstəqil Türk dövlətlərini ziyarət edərkən gördüyü qonaqpərvərlikdən qürur duyduğunu bildirərək bunları qeyd etdi: “Mən uğurlu bir elm adamıyam, amma çox uğurlu elm adamları da var. Qardaşlarım, hər ziyarətimdə məni özlərindən biri kimi qarşıladılar. Ata torpaqlarımızda Türk Birliyini hiss etdim. Türk Dünyasındakı Türklük şüuruna şahid oldum. Bu, məni çox sevindirdi.”

Türk Dünyasının Birlik Simvolu Hədiyyələr

Prof. Dr. Aziz Sancara tədbirin sonunda Baş katib Sultan Raev tərəfindən Türk Dünyasının birliyi və zəngin mədəniyyətini əks etdirən mənalı hədiyyələr təqdim edildi. Hədiyyələr arasında Qazaxıstandan çapan, Qırğızıstandan qalpaq, Özbəkistandan milli qurşaq, Türkiyədən qurd başlı əsa, Azərbaycandan Qarabağ Zəfərinin simvolu olan Xarı Bülbül dizaynlı yaxa sancağı və Türkmənistandan xüsusi nəşr olunmuş Mahtumqulu Fəraqinin əsəri var idi. Sancar, bu hədiyyələri Türk Dünyasının birlik və həmrəyliyinin simvolu kimi qiymətləndirərək təşəkkür etdi.

Sərgi Aziz&Gwen Sancar Mədəniyyət Mərkəzinə Hədiyyə Edildi

Proqram TÜRKSOY-un xüsusi olaraq hazırladığı foto sərgisinin açılışı ilə davam etdi. Sərgidə Türk Dünyasının Mədəniyyət Paytaxtı seçilmiş şəhərlərin fotoları və TÜRKSOY-un ənənəvi olaraq keçirdiyi rəsm müsabiqəsində qalib gələn uşaqların və gənclərin əsərləri yer aldı. Sərgi tədbirin sonunda Aziz&Gwen Sancar Mədəniyyət Mərkəzinə hədiyyə edildi.

Türk Dünyasının Mədəniyyət Elçisi Nişanı: Birliyin və Aydınlığın Simvolu

TÜRKSOY-un başladığı “Türk Dünyasının Mədəniyyət Elçisi” proyekti mədəniyyət, incəsənət, idman və elm sahəsində fərqlənən şəxslərə TÜRKSOY Daimi Şurasının qərarı ilə təqdim olunan xüsusi bir nişandır.

Nişanın dizaynında TÜRKSOY-un təsisçi üzvləri olan Azərbaycan, Qazaxıstan, Özbəkistan, Türkmənistan və Türkiyəni təmsil edən 6 ulduz və mərkəzdə Türk Dünyasının aydın gələcəyini simvolizə edən günəş yer alır. Nişan TÜRKSOY loqosundan ilham alaraq tərtib edilmiş və firuzəyi reng ilə bəzədilmişdir. Nişanın ön tərəfində “Türk Dünyasının Mədəniyyət Elçisi” ifadəsi, arxa tərəfində isə runik əlifba ilə yazılmış “Türk” sözü və İsmayıl Qaspıralının “Dildə, fikirdə, işdə birlik” ifadəsi yer alır.