― 20 марта 2025 г.

Baş katib Raev Türk Dünyasının Novruz bayramını təbrik etdi

Əziz Türk Dünyasının dəyərli üzvləri, qiymətli dostlar,

Baharın gəlişi ilə birlikdə təbiətin yenidən canlandığı, ümidlərin çiçəkləndiyi və qardaşlıq bağlarımızın möhkəmləndiyi Novruz Bayramınızı ən səmimi arzularımla təbrik edirəm.

Türk Dünyasının ortaq mirası olan Novruz, əsrlər boyu birliyimizin və bərabərliyimizin, dostluq və qardaşlığımızın ən güclü rəmzlərindən biri olmuşdur. Türküstan çöllərindən Anadoluyadək, Qafqazlardan Balkanlaradək geniş bir coğrafiyada qeyd olunan bu qədim bayram, ortaq mədəniyyətimizi və dərin köklərə malik keçmişimizi gələcəyə daşıyan ən mühüm dəyərlərdən biridir.

TÜRKSOY olaraq bizlər, Novruzun ruhunu yaşatmağa, bu müqəddəs günü bütün dünyaya tanıtmağa və Türk xalqlarını bir araya gətirən mədəni irsimizi qoruyaraq gələcək nəsillərə çatdırmağa davam edirik. Bu şüur və məsuliyyətlə, ortaq mədəniyyətimizi yaşatmaq məqsədilə təşkil etdiyimiz tədbirlərlə, Novruzun sülh, dostluq və qardaşlıq mesajlarını daha geniş kütlələrə çatdırmağı davam etdirəcəyik. 

Bu gözəl bahar günündə, Novruzun bərəkət, sağlamlıq və xoşbəxtlik gətirməsini diləyir, bütün Türk Dünyasına əmin-amanlıq arzulayıram.

Novruz Bayramınız mübarək olsun!

Sultan Raev

TÜRKSOY Baş Katibi